تحليل بالعامية .. توقعات سعر الدولار مقابل الجنيه المصري لشهر مايو وتأثيره على الاسعار في الشارع المصري

هنتكلم في المقال ده بالعامية علشان نوصل المعلومة بطريقة سهله جدا ، في سؤال بيشغل كتير من الناس الفترة دي  ايه توقعات سعر الدولار في نهاية مايو ؟، هل يتوقع المتعاملون انهيار في سعر الدولار وانه ينزل لأقل من 40 جنيه؟ وإزاي ده هيأثر على الأسعار والأسواق؟

تعالى اوضحلك ليه الدولار هينزل، في الفترة الجاية، مصر هتيجي كمية كبيرة من الدولار من صفقات وقروض ودعم مالي زي الدفعه الاخيرة من صفقة رأس الحكمة، وده هيزيد المعروض من الدولار في البنوك، وبناءً على القوانين الاقتصادية، لو المعروض زاد هيبقى في احتمالية كبيرة ان الدولار ينزل في السعر.

وفي توقعات لمؤسسة "بي إم آي للأبحاث"، هما قالوا إن الجنية هيعوض جزء كبير من اللي خسره خلال 2024.

كمان، في تقرير من مصادر مصرفية، ممكن الدولار ينزل من 48 جنيه لـ40 جنيه في نهاية مايو، وكمان بتوقعات من بنك "جولدمان ساكس"، هما قالوا إن البنك المركزي ممكن يخفض أسعار الفايدة بشكل كبير في شهر مايو، وده هيخفض الضغوط على الحكومة في الفترة الجاية.

ومعنى ان الدولار ينزل في السعر، هتنخفض أسعار السلع زي مواد البناء والعربيات والأجهزة الإلكترونية والاكل والشرب، والنسبة المتوقعة للانخفاض ممكن توصل لـ 25%.

وفي النهاية، اجتماع لجنة السياسة النقدية الاستثنائية بقرارتها هيكون لها تأثير على السوق، وممكن تكون فرصة لدعم توقعات انخفاض سعر الدولار في شهر مايو، خلينا نستنى ونشوف ايه ممكن يحصل في اسعار صرف العملات في السوق المصري.