تصريح ناري من ميدو ضد محمود كهربا.. «سرطان داخل الأهلي»
شن أحمد حسام ميدو، نجم الزمالك ومنتخب مصر السابق، هجومًا على محمود عبد المنعم كهربا، لاعب الأهلي، ووصفه بأنه «سرطان داخل أي فريق»، معتبرًا أن قرار التعاقد معه هو «أكبر خطأ» في تاريخ الأهلي، حسب قوله.
وكتب ميدو، عبر حسابه على موقع التواصل الاجتماعي «اكس» تعليقًا على أحداث ما بعد مباراة الأهلي وشباب بلوزداد، «من حق المشجع اللي هو أكثر واحد بيتأثر نفسيا بأي نتائج سلبية أو بأي تصرفات تقلل من النادي صدرت من أي شخص داخل المنظومة إنه يعبر عن غضبه طالما الغضب ده مافيهوش أي سب لأي شخص ولكن غضب عن طريق إيصال رسائل إلى الإدارة والجهاز واللاعيبة».
وأضاف ميدو: «وده اللي عملوا فعلًا جمهور الأهلي قبل الماتش ورد فعل اللاعيبة كان عظيم بالفوز الكبير وطبيعي إن الجمهور لما يلاقوا لاعيبتهم موتوا نفسهم في الملعب إنهم يحيوهم بعد الماتش علشان يقفلوا الصفحة ويوصلوا للاعيبة رسالة إن بفوزك النهارده الكبير الصفحة اتقفلت ومش هنقبل إلا بالأداء والنتائج دي وهي دي عقلية مشجع الأندية الكبيرة مفيش غيرها وعقلية المشجع دي هي اللي بتتنقل لكل فرد داخل المنظومة وهي أساس نجاح أي نادي كبير».
وتابع قائلًا: «كان لازم اللاعيبة تروح تحيي الجمهور ويفهموا إن جمهورهم معاهم مش ضدهم.. إنما أيه اللي حصل مين المستفيد الأكبر إن يكون في خلاف ما بين الجمهور والمجموعة علشان مايبقاش شايل الليلة لوحده؟».
وواصل قائلًا: «مين ورط الشناوي واللاعيبة في مشكلته مع الجمهور؟ الحقيقة هو لاعب واحد فقط وجوده سرطان داخل أي فريق هو كهربا وهو فعلا كما قلت من قبل وبعض من أصدقائي الأهلاوية زعلوا مني.. قرار التوقيع معاه أكبر غلطة في تاريخ الأهلي».
من حق المشجع اللي هو أكثر واحد بيتأثر نفسيا بأي نتائج سلبية أو بأي تصرفات تقلل من النادي صدرت من أي شخص داخل المنظومة انه يعبر عن غضبه طالما الغضب ده مافيهوش أي سب لأي شخص ولكن غضب عن طريق إيصال رسائل إلى الادارة والجهاز واللاعيبه وده اللي عملوا فعلا جمهور #الاهلي قبل الماتش ورد…
— Mido (@midoahm) December 23, 2024
وسبق وأن هاجم ميدو كهربا بعد أزمة السوبر المحلي، واستبعاد اللاعب من خوض المباراة النهائية للبطولة وإصدار قرار عودته إلى القاهرة.
وقال ميدو حينها: «زعل مني بعض الأهلاوية لما قلت إن صفقة كهربا مالهاش أي لازمة، وإن مهما عملت معه مش هيتعدل أبدًا».
وأردف قائلًا: «والأيام بتثبت إن الكلام اللي قلته ماكانش الغرض منه الهجوم على إدارة الأهلي، ولكن كان تحليل للموقف بناءً على خبرات كونتها من خلال التعامل مع اللاعب نفسه».
