«ميدو» يقدم اعتذاره لجمهور الأهلي.. ويؤكد: «مفيش حاجة تستاهل تبقى منافق»
قدم أحمد حسام ميدو، لاعب الزمالك ومنتخب مصر السابق، اعتذاره لجماهير الأهلي بعد تصريحه بأنه لن يشجع الأهلي في كأس العالم للأندية 2025.
وقال ميدو، عبر حسابه على موقع التواصل الاجتماعي «اكس» (تويتر سابقًا)، «أنا ابن الزمالك وأكبر فخر ليا في حياتي إني ابن المدرج ابن الثالثة يمين.. بلعب في الزمالك من وأنا عندي 9 سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك بطاقتي وانا عيل صغير هي كارنيه اتحاد الكورة اللي مكتوب عليه اسم الزمالك.. تتلمذت على أيد مدربين عظماء علموني إني أنتمي لفريقي بس وما أشجعش أي نادي ثاني في مصر بالذات إلا نادي الزمالك أي كان بيلاعب مين ولكن في نفس الوقت اتربيت اني احترم كل المنافسين واهنيهم لو كسبوا واباركلهم واقولهم هارد لك لو خسروا».
وأردف قائلًا: «هو ده معنى الروح الرياضية بالنسبة لي!! لما اتسألت في الاستوديو هتشجع الاهلي في كأس العالم للأندية رديت بطبيعتي دون اي نفاق او كذب لان بكل بساطه مفيش حاجه في الدنيا تستاهل إنك تكون كذاب ومنافق!».
وتابع قائلًا: «أتفق معاكم إن التوقيت ما كانش مناسب وبعتذر لأي حد زعل اني قلت الكلام ده في حدث مهم يخص النادي الأهلي، وأنا شايف الناس اللي زعلت بخصوص ان الوقت مش مناسب عندهم كل الحق..اما لو اتسألت مليون مرة هتشجع اي نادي تاني في مصر غير الزمالك إجابتي هتكون هي هي عمرها ما هتتغير لغاية لما اموت».
وأكمل ميدو قائلًا: «أما بخصوص الهجوم اللي بتعرضله فأنا عاذر الناس لانهم ممكن يكونوا اتعودوا على اجابات مختلفه في السنوات الاخيرة من ناس تصدروا المشهد في الاعلام وهما اكتر ناس بيأذوا المنافس في الخفاء واكتر ناس بتتمنى من قلبها خسارة المنافس من جواهم..مش هرد على اي حد هاجمني لان بكل بساطه أنا في مرحلة في حياتي شايف ان مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش اكتر من كده».
وجدد ميدو اعتذاره قائلًا: «مره ثانيه بعتذر اني كنت سبب في جدال قائم الايام اللي فاتت للاسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة!!».
انا ابن #الزمالك وأكبر فخر ليا في حياتي اني ابن المدرج ابن الثالثه يمين بلعب في الزمالك من وانا عندي ٩ سنين وانا عيل صغير كنت بروح ب فانلة الزمالك في المواصلات علشان الناس كلها تعرف اني ناشئ في الزمالك بطاقتي وانا عيل صغير هي كارنيه اتحاد الكورة اللي مكتوب عليه اسم الزمالك..…
— Mido (@midoahm) December 9, 2024
