أحمد شوبير يرد على اتهامه في أزمة الراحل أحمد رفعت
علق الإعلامي أحمد شوبير على اتهامه في أزمة الراحل أحمد رفعت، لاعب الفريق الأول لكرة القدم بمنتخب مصر ونادي فيوتشر.
قال شوبير في تصريحات تلفزيونية: “الحلقة بتاعة أحمد رفعت اللي طلع فيها في التليفزيون كانت المفروض معايا، رحت أنا ومصطفى زرنا أحمد لما ربنا أكرمه وفاق وقعدنا نضحك معاه شوية، وبعدين كلمت دكتور وليد دعبس وهيثم عرابي علشان اجيبه ضيف وبدأنا نرتب للحلقة وفي الآخر لأسباب يعني طلع في برنامج تاني”.
تابع: “أحمد ولا جاب سيرتي ولا شاور عليا ولا أي حاجة، أنا عامل مداخلة مع أحمد قبل المرض وسألته مين السبب في رجوعك وقال اتنين، ده في المداخلة معايا أنا، كل الناس عارفة إن أنا أبعد ما يكون عن هذا الأمر، فلما ألاقي ناس زمايلي بيحاولوا يلبسوني الموضوع ده أمر يضايق، دي تهمة”.
أكد: “الكل يعلم تماما إن لم يكن ليا أي علاقة بنادي فيوتشر في هذا التوقيت، أنا رحت النيابة وسألوا كل الناس حتى عامل غرفة اللبس واستكتبونا علشان يقارنوا الخطوط في محاضر مجلس إدارة النادي”.
وعن اتهامه لأحمد رفعت بتعاطي المنشطات، قال: “مقولتش كده خالص.. في آخر جملة قولت لا أقصد أحمد رفعت، قولت الموضوع ده مالوش علاقة بأحمد رفعت، هما جابوا كل حاجة وشالوا الكلمة الأخيرة.. إطلاقا ولا ليا علاقة بموضوع أحمد لما اتكلمت على للمنشطات، الكلام كان عن اتهام رمضان صبحي بالمنشطات والإيقاف وقولت لا بد من عودة كشف المنشطات، مكنتش أقصد أحمد خالص، أنا بحبه على المستوى الشخصي”.
اختتم: “لما رحت عزا أحمد رفعت الله يرحمه، أخوه وخاله حضنوني ونادر شوقي وكيل أعماله وقالولي إحنا مسئولين نجيبلك حقك وإحنا عارفين كويس أوي وأحمد قايلنا القصص كلها وحقك علينا ومتزعلش مننا.. ودخلت بوست على رأس والدته.. ده اتهام ضايقني لأن القصة كلها اتاخدت أهلي وزمالك”.
