تعليق قوي من فاتن عبد المعبود على طبيبة كفر الدوار: جت تلعب بالتريند ضرب فى وشها

علقت الإعلامية فاتن عبد المعبود، على واقعة الطبيبة وسام شعيب دكتورة أمراض النساء والولادة، والمعروفة إعلاميًا باسم «طبيبة كفر الدوار»، قائلةً: «الدنيا قامت بسببها من امبارح بالليل ومقعدتش لحد دلوقتي».

وأضافت فاتن عبد المعبود خلال تقديم برنامج «صالة التحرير» المذاع على NNi مصر، «الكل اختلف على واقعة طبيبة كفر الدوار، ومحدش عارف هى جت تلعب على التريند ضرب فى وشها!.. ولا كان عندها حق ونيتها كانت خير وتقصد توعي الأمهات!».

وتابعت فاتن: «ربنا اللي عالم بالنية، لكن الأكيد أن الدكتورة وسام شعيب أخطأت خطأ كبير، فحتى لو كان غرضها النصيحة؛ فالنصيحة على الملأ فضيحة، ومن غير المقبول الإساءة إلى أي ست أو بنت مصرية فهو خط أحمر لا يمكن التصالح أو التسامح فيه».

وأردفت الإعلامية فاتن عبد المعبود: «صحيح الدكتورة وسام شعيب مذكرتش أسماء مرضاها.. بس هو مينفعش نفشى أسرار المرضى وننتهك خصوصياتهم، ولا ينفع الطبيبة تبقى شغلتها الفيديوهات والتريندات وفي أخر الفيديو تقول للناس لايك وشير وتابعوا صفحتي!»

وأكملت فاتن: «لمّا دخلنا على صفحة الطبيبة وسام شعيب عبر الفيسبوك؛ لقينا إن دة مش الفيديو الوحيد وإنها بتنزل فيديو كل يومين تلاتة بتتكلم فيه عن الحمل السفاح وحالات كشف العذرية والناس اللى بتجيلها بنزيف بسبب الجواز وغيرها من الفيديوهات اللى هدفها التريند».

واختتمت الإعلامية فاتن عبد المعبود: « الطبيبة وسام شعيب تحوّلت من طبيبة أقسمت على قسم المهنة اللي المفروض تحافظ عليها؛ إلى يوتيوبر وبلوجرز تبحث عن التريند والمشاهدة بدليل إنها بتقول فى أخر الفيديو لايك وشير وتابعوني!».