لاعب الزمالك يعلن فسخ عقده دون علمه.. بييجوا على المحترم والمتربي
كشف علي ياسر لاعب صفوف فريق الزمالك، تفاصيل فسخ النادي لعقده بعدما قطع إعارته مع مودرن سبورت، خلال الفترة الماضية.
وكتب علي ياسر، عبر حسابه الشخصي على «فيسبوك»: «(وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا) بعد إغلاق القيد حابب أقول حاجة بس بعد ما قطعت إعارتي مع نادي مودرن سبورت (فيوتشر) لحد النهارده الصبح كنت مفكر اني متقيد في نادي الزمالك زي ما اتقال ليا بعد محاولات كتيرة من التواصل مع مسؤلين النادي قبل إغلاق القيد».
وأضاف «لا حد سأل فيا ولا اتواصل معايا عشان أعمل أبسط حقوقي إني أنزل أتمرن حتى بعد ما رحت النادي اسأل على موقفي وإني محتاج أعرف هعمل إيه لأني قاعد في البيت بقالي شهرين وهقعد في البيت لحد شهر يناير اتفاجئت إن النادي استغنى عني قبل ما القيد يقفل بدون علمي لا حد كلف نفسه ثانية يكلمني يقولي على حاجه ولا حد كلف نفسه ثانية يرد عليا عشان اعرف موقفي بعد ما اتقال ليا قبل كده من مدير الكورة إني متقيد في النادي».
وتابع «لحد دلوقتي أنا قاعد في البيت بسبب تعاملي باحترام واحتراف زي ما اتربيت واتعلمت من وأنا صغير بس في الكورة ساعات بيجوا على المحترم والمتربي شوية ودايمًا هيفضل عندي قناعة إن في الكورة زي ما في الحلو في الوحش وده جزء كبير من الكورة فبكل الظروف هنعدي بيه ونستحمله عشان دي الحاجه اللي الواحد بيعرف يعملها وبيحبها».
وواصل تصريحاته «الله يعلم إني محب ومشجع لنادي الزمالك منذ الصغر وإني كنت أتمنى أتوج مع نادي الزمالك بكل شئ لأن ده حلمي منذ الصغر لكن بعض الناس كان لها رأي آخر».
واختتم علي ياسر «لكن حابب أشكر الجمهور واللاعيبة والمدربين اللي وقفوا معايا وساندوني في أول ظهور ليا مع نادي الزمالك وفضهري من وأنا صغير داخل جدران نادي الزمالك ودايما كانوا أخواتي الكبار ودايما كنت بتعلم منهم ونسأل الله التوفيق فما هو قادم ليا و لنادي الزمالك وشكرًا».
