أهل العروسة ضحكوا عليه.. عم ناصر: عندي 65 سنة وتفاجئت ليلة الدخلة إن العروسة عندها 16 سنة ومش عذراء
«عندي 65 سنة، وليلة الدخلة تفاجئت بإن العروسة عندها 16 سنة ومش بِكر».. بهذه الكلمات روى العم ناصر محمد، تفاصيل زواجه المثير عن طريق الإنترنت بإحدى الفتيات الشابة.
وقال ناصر: «طلبت اتجوز من على النت، وفيه ناس تواصلت معايا قالولي فيه بنت من الفيوم وكويسة، ولما روحت ليهم وافقوا والأمور كانت تمام لحد كده».
وتابع العم ناصر خلال لقائه مع الإعلامية نهال طايل ببرنامج «تفاصيل» المذاع على NNi مصر 2، «قدمت شبكة بحوالي 65 ألف جنيه، ودفعت مهر 20 ألف جنيه لأبوها».
وأردف ناصر: اللي خلاني افكر اتجوز في السن ده، هو إن زوجتي ضريرة بقالها 20 عامًا، ولم أعد قادرًا على خدمة نفسي في المنزل، معقبًا: «عندما اقترحت على زوجتي الزواج من أخرى؛ وافقت على الفور ورحّبت بالمبدأ، ورويت هذه القصة لأهل زوجتي الجديدة، ولم يكن لديهم مانع».
واستكمل العم ناصر حديثه: «سافرت الفيوم وعملنا الفرح وكل حاجة، وكانوا قايلين ليا إن الدخلة هتكون بعد الفرح بأسبوع، ولكن يوم الدخلة تفاجئت بأن لديها 16 عامًا ونصف مش 19 سنة زي ما أهلها قالولي قبل الزواج».
وتابع: «هما وقتها قالولي إن المأذون بياخد وصل أمانة على الطرفين حتى تتم العروسة السن القانوني ويتم توثيق الزواج»، معقبًا: «طالبت بفلوسي والذهب لما عرفت الحقيقة، ولكن أهل العروسة قالولي ملكش حاجة ولو عايز تمشي امشي من غير حاجة».
وأضاف ناصر: «كتبنا عقد زواج عرفي، وأخذت العروسة ومشيت على شقة الزوجية، ولما وصلنا هناك تفاجئت بأن العروسة ليست عذراء، واعترفت ليا إنها كانت ماشية في سكة غلط عشان تجيب لأهلها فلوس عشان يعيشوا ويصرفوا منها».
واختتم: «زوجتي الجديدة طلبت مني إنها تروح لأهلها تقعد يومين، ومن ساعتها مجتش لحد دلوقتي، واكتشفت بعدها إنهم أخذوا ذهب زوجتي الضريرة معهم أيضًا، بعد أن تمكنت من سرقته بجانب 15 ألف جنيه آخرين».
